|
Quen somos Actualidade Ligazóns |
Mesa Galega a prol da Innovación |
|
Requerimento ao goberno galego: revisión das actuacións do Goberno en Funcións en materia de informática [ 2005 08 09 (10:06) ] Tal como foi recollido amplamente polos meios de comunicación, o goberno
en funcións presidido por D. Manuel Fraga Iribarne acometeu un intenso
proceso de contratacións, licitacións e adxudicacións unha vez coñecido o
resultado eleitoral. Entre os obxectos desas actuacións, destacan
diversos productos e servizos informáticos asociados a distintas
instancias da administración autonómica por máis de sete millóns de euros. A Mesa Galega pola Libre Innovación require do Goberno
Galego a revisión de todas estas actuacións xa que a adxudicación destes
contratos condicionaría seriamente o cumprimento dos acordos programáticos
do novo Goberno Galego no decurso da presente lexislatura.A Mesa Galega pola Libre Innovación, formada por empresas que operan no
ámbito das novas tecnoloxías da información e da comunicación, grupos de
utilizadores de Linux así como outras instancias da sociedade galega,
manifesta a súa preocupación polas actuacións do cesado goberno en
funcións relativas a productos e servizos informáticos que afectan á
Administración Pública. A adxudicación destes contratos condicionaría
seriamente o cumprimento dos acordos programáticos do novo Goberno Galego
no decurso da presente lexislatura.
Tal como foi recollido amplamente polos meios de comunicación, o goberno
en funcións presidido por D. Manuel Fraga Iribarne acometeu un intenso
proceso de contratacións, licitacións e adxudicacións unha vez coñecido o
resultado eleitoral. Entre os obxectos desas actuacións, destacan
diversos productos e servizos informáticos asociados a distintas
instancias da administración autonómica por máis de sete millóns de euros
(7.565.120,41 €) entre os que cabe mencionar os seguintes:
Sanidade (925.000 €) Resolución do 7 de xuño de 2005, da División de
Recursos Económicos, pola que se anuncia concurso, para a contratación do
Servicio de Evolución e Despregamento de Contornos Colaborativos e do
portal corporativo, neste organismo e a Consellería de Sanidade. (DOG nº
124, de 29 de xuño de 2005)
Sanidade (1.312.537 €) Resolución do 13 de xuño de 2005, da División
de Recursos Económicos, pola que se anuncia concurso, para a
contratación do arrendamento de servidores e software de base
para este servizo. (DOG nº 131, de 8 de jullo de 2005)
Augas de Galicia (240.000 €) Resolución do 24 de xuño de 2005 pola que se
anuncia a licitación, polo sistema de concurso con procedemento aberto, da
contratación da consultoría e asistencia para o apoio á Sección de
Informática deste organismo. (DOG nº 124, de 29 de xuño de 2005)
Presidencia (225.740 €) - Resolución do 21 de xuño de 2005 pola que se
convoca concurso, polo procedemento aberto e trámite de urxencia, para a
contratación dunha asistencia para a administración e xestión de servizos
telemáticos desta consellería. (DOG nº 124, de 29 de xuño de 2005)
Presidencia (65.190 €) - Resolución do 21 de xuño de 2005 pola que se
convoca concurso, polo procedemento aberto e trámite de urxencia, para a
contratación dunha asistencia para a xestión de aplicacións web e o seu
contorno técnico de explotación, de responsabilidade desta consellería.
(DOG nº 124, de 29 de xuño de 2005)
Presidencia (400.000 €) - Resolución do 31 de maio de 2005 pola que se
convoca concurso, polo procedemento aberto, para a contratación dunha
asistencia para a realización da migración dos módulos centrais do sistema
de xestión de procedementos administrativos. (DOG nº 124, de 29 de xuño de
2005)
Presidencia (235.000 €) Resolución do 31 de maio de 2005 pola que se
convoca concurso, polo procedemento aberto, para a subministración de
servidores para a plataforma do sistema de xestión de procedementos
administrativos da Xunta de Galicia. (DOG nº 126, de 1 de xullo de 2005)
Sanidade (928.841,31 €) - Resolución do 26 de maio de 2005, da División de
Recursos Económicos, pola que se fai pública a adxudicación do contrato de
desenvolvemento, implantación, soporte e mantemento de aplicacións
informáticas da área de programas especiais do servizo de informática e
migración da aplicación de xestión da incapacidade temporal (S/008-2005).
(DOG nº 128, de 5 de xullo de 2005)
Sanidade (204.000 €) - Resolución do 2 de xuño de 2005, da División de
Recursos Económicos, pola que se fai pública a adxudicación do contrato de
contratación da dirección do proxecto de consolidación de servizos de
correo e web para este organismo (S/022-2005). (DOG nº 130, de 10 de xullo
de 2005)
Presidencia (50.000 €) Resolución do 29 de xuño de 2005 pola que se
anuncia concurso, polo procedemento aberto, dun contrato de asistencia
técnica consistente no mantemento e desenvolvemento de aplicacións da
Secretaría Xeral de Relacións coa Unión Europea e Cooperación Exterior.
(DOG nº 133, de 12 de xullo de 2005)
Sanidade (2.199.984€) Resolución do 23 de xuño de 2005, da Dirección
Xerencia do Complexo Hospitalario Universitario Juan Canalejo da Coruña,
pola que se fai pública a adxudicación definitiva do procedemento
negociado 194/2004 de arrendamento de equipamento hardware e software.
(DOG nº 146, de 1 de agosto de 2005)
Presidencia (778.828,41 €) Resolución do 1 de xullo de 2005, da División
de Recursos Económicos, pola que se fai pública a adxudicación do contrato
de servizo técnico de análise, deseño e desenvolvemento de novos módulos
do sistema informático de saúde pública e mantemento e incorporación de
novas funcionalidades nos existentes (C/001-2005). (DOG nº 150, de 5 de
agosto de 2005)
Estas actuacións afectan aos pontos neurálxicos da rede da administración
pública galega, con especial incidencia nas Consellerías de Presidencia e
Sanidade, e levan implícitas escollas tecnolóxicas que son contrarias aos
compromisos adquiridos polo Goberno Galego coa cidadanía a través do
Acordo sobre Bases Programáticas para a Acción do Goberno. Ademais de
supoñer un incremento sen control do gasto público, condiciona ao
implementar esas escollas tecnolóxicas a acción do goberno en materia de
novas tecnoloxías perxudicando gravemente o desenvolvemento das políticas
de innovación industrial e empresarial.
Alén do feito de seren iniciadas estas actuacións durante a fase de cambio
de goberno, moitas delas incurren en vulneracións de lei e ignoran as
recomendacións que distintas instancias estatais teñen proposto para esta
clase de adxudicacións. Como fundamentos de Dereito, citamos os seguintes:
- a Lei de Contratos das Administracións Públicas, que resulta ampliamente
vulnerada na fase de publicitación destas actuacións.
- a Proposta de Recomendacións da Administración General del Estado sobre
a utilización de software libre e fontes abertas, que é ignorada nestas
actuacións facendo escollas implícitas de opcións tecnolóxicas
- a Ley 4 de xaneiro de 2005 onde nas súas motivacións fai referencia ás
ventaxas económicas, estratéxicas e sociais do uso do software libre
- moi especialmente, o Informe do Tribunal de Contas de 30 de marzo de
2005 onde se di que as decisións do uso de software que impliquen costes
para a Administración deben xustificarse ampliamente, cousa que en nengún
caso tivo lugar.
Estes motivos fundamentaron os recursos de alzada apresentados pola
empresa Igalia contra as actuacións referidas ao
SERGAS, recursos que a Mesa Galega pola Libre Innovación apoia e valora
como un exemplo do exercizo de cidadanía activa que o Goberno Galego
requeriu á poboación galega na súa investidura.
Por todo o exposto, a Mesa Galega pola Libre Innovación require do Goberno
Galego a revisión de todas estas actuacións xa que a adxudicación destes
contratos condicionaría seriamente o cumprimento dos acordos programáticos
do novo Goberno Galego no decurso da presente lexislatura.
|