|
Quen somos Actualidade Ligazóns |
Mesa Galega a prol da Innovación |
|
O Parlamento Europeo rexeita a directiva de patentes [ 2005 07 06 (14:15) ] Tras un tránsito de cinco anos nas institucións europeas, a polémica
directiva de patentes de programación foi definitivamente rexeitada polo
Parlamento Europeo. Dende a Mesa Galega pola Libre Innovación avaliamos
moi positivamente o resultado e queremos agradecer os esforzos de todas as
personas e organizacións que nos axudaron a difundir esta cuestión e a
conquerir o rexeitamento da proposta.
Como froito dunha iniciativa da Oficina Europea de Patentes co BSA
(Business Software Alliance, de Microsoft) a Comisión Europea iniciou no
ano 2000 a tramitación dunha directiva comunitaria encamiñada a regular e
harmonizar as políticas dos estados membros en materia de patentes de
software. Para ultrapasar os impedimentos establecidos pola Convención de
Munich de 1973 que impedían a patentabilidade de programas de ordenador,
métodos de negocio e abstraccións matemáticas, a Comisión comezou a
empregar o termo 'Invencións Implementadas en Computador' que transmite a
idea de que as patentes son aplicadas sobre máquinas que empreguen
programas, sen deixar claro se os programas mesmos podían ser patentados.
Con esta formulación foi elaborada unha proposta polo Consello que na súa
primeira leitura no Parlamento Europeo foi aprobada engadindo un conxunto
de enmendas que impedían de forma explícita a patentabilidade dos
programas de ordenador.
O texto e as enmendas aprobadas polo Parlamento foron ignoradas polo
Consello Europeo que, presionado polos grupos pro-patentes e os grandes
monopolios de software, reescrebeu a proposta ignorando as emendas e
propoñendo un novo texto aínda máis belixerante de cara a facilitar a
patentabilidade dos programas. Este texto, que foi aprobado polo Consello
de forma pouco rigorosa baixo a Presidencia Irlandesa, é o que acaba de
ser rexeitado polo Parlamento Europeo a iniciativa do ponente do informe
sobre a directiva, o francés Michel Rocard, debido á falta de claridade do
texto e ao comportamento antidemocrático do Consello.
O resultado da votación significa por tanto un éxito para os grupos de
presión que tratamos de impedir a patentabilidade do software e tamén unha
seria chamada de atención ao Consello no que á súa práctica democrática se
refire.
|